പഞ്ചായത്ത് കുളത്തില്‍ ഉപ്പ് വെള്ളം കയറി. കര്‍ഷകര്‍ വിഷമിക്കുന്നു

തൃക്കരിപ്പൂര്‍: ഉപ്പ് വെള്ളം കയറി പാടശേഖരത്തെ കുളം നാശമായി. വലിയപറമ്പ ഗ്രാമപഞ്ചായത്തിലെ മാടക്കാല്‍ പഴയകടവിന് സമീപത്തെ പാടശേഖരത്തിലെ പഞ്ചായത്ത് കുളമാണ് മാടക്കാല്‍ പുഴയില്‍ വേലിയേറ്റം മൂലം ഉപ്പ് വെള്ളം കയറി നാശമായിരിക്കുന്നത്. തെങ്ങ് കൃഷിക്കും നെല്‍ കൃഷിക്കും വെള്ളം പമ്പ് ചെയ്യുന്നതിന്ന് കര്‍ഷകര്‍ ഉപയോഗിക്കുന്ന കുളമാണിത്. ഉപ്പ് വെള്ളം കയറിയതിനാല്‍ ശുദ്ധജലം ലഭിക്കാത്തത് മൂലം പരിസരത്തെ പാടശേഖരം വിത്തിറക്കാനാകാതെ തരിശിട്ടിരിക്കുകയാണ്. ഗ്രാമപഞ്ചായത്ത് പദ്ധതിയില്‍ കുളം റിപ്പയര്‍ ചെയ്യുന്നതിന്ന് പദ്ധതി രൂപീകരിച്ചിട്ടുണ്ടെങ്കിലും പ്രവൃത്തി തുടങ്ങിയിട്ടില്ലെന്ന് കര്‍ഷകര്‍ പറഞ്ഞു.